थानकोट (शोणितपुर) इमाखेल (शुरूमा शोणितपुर विनायक विद्याश्रमको नामले स्थापित
भई हाल मङ्गलोदय माध्यमिक विद्यालय रहेको) चहुरको पुछारमा इन्द्रविनायकको सानो
मन्दिर रहेको छ ।त्यसको प्रादुर्भावको सम्बन्धमा प्रचलित किम्बदन्तीको छन्दोबद्ध
वर्णन यहाँ प्रस्तुत गरिन्छ ।
इन्द्रविनायक
(नेवारी किम्बदन्ती)
प्राचीन कालमा एक थियो भव्य
जलाशय,
नागह्रद भनिन्थ्यो त्यो हुनाले
नाग-आश्रय ।
दहोच्चगिरिमा देखी धरावतरण
इन्द्रको
तानी तान्त्रिकले ल्यायो लगाई
बल मन्त्रको ।
राख्यो बन्दी तुल्याएर शोणितपुरबाहिर
पितृसंग कुरा गर्ने शर्तमा
मुक्ति खातिर ।।
स्वर्गीय पितृका साथ ज्यूँदो
मानिसको कुरा
असम्भव हुँदा इन्द्र अन्यौलमा
परे पूरा ।
इन्द्र सक्तैनथे गर्न विधिको
रीति लङ्घन,
तसर्थ भोग्नुपर्ने भो मान्छेको
घोर बन्धन ।।
के गर्ने लौ भनी इन्द्र परे
बिखलबन्दमा,
रहे तान्त्रिकको बन्दी बनेर
मृत्यलोकमा ।
रोकियो स्वर्गको कामकाज इन्द्रबिना
अब,
वर्षाबिना खडेरीले स्वाहा
पार्यो धरा सब ।।
स्वर्ग औ मर्त्यको हाहाकार
सारा हटाउन
गणेश नै भए बाध्य धरामा तल
ओर्लिन ।
शोणितपुरमा उत्रे देवका गणनायक,
पुगी तान्त्रिकका सामु भन्न
लागे विनायक :
"पितृसंग कुरा गर्नु छ असम्भव,
सज्जन !
इन्द्र बन्दी हुँदा खाली स्वर्गको
छ सिंहासन ।
राजी छु इन्द्रको सट्टा धरामा
नित्य बस्न म,
शोणितपुरवासीको रक्षा गरेर
हर्दम ।।
सुदृष्टि रहला देशवासीमा इन्द्रको
सदा,
हराभरा रही खेत उब्जला अन्न
सर्वदा ।
सहकाल रही होला उन्नति देशको
पनि,
सिद्ध भै म यहीं बस्छु इन्द्रविनायकै
बनी ।।"
इन्द्र मुक्त भई लागे स्वर्गतर्फ
सरासर,
बन्यो गणेशको स्थान नजिकै
देशबाहिर ।
सहकाल भई अन्न प्रशस्त खेतमा
फल्यो,
शोणितपुरवासीको घर धपक्क भै
बल्यो ।।
मङ्गलोदय माध्यमिक विद्यालय
गणेशको कृपाद्वारा देशको उन्नति
भयो,
दहोच्चगिरि फेदीमा धानको रास
थुप्रियो ।
फलेको खेतमा धान खान्थे वर्षभरि
जन,
चुलिन्थ्यो धानको थुम्को बर्सेनी
थपिंदै पुनः ।।
काम नै नगरी खान पाइने हुन
गो जब,
अल्सीका पिण्ड भै मोजमज्जामै
अल्झिए सब ।
अकर्मण्य बने सारा, चुलियो लोभलालच,
स्वार्थको पूर्तिका लागि मच्चियो
मात्र कच्कच ।।
देखेर जनको चाला रिसाए देशरक्षक,
अन्तर्ध्यान भए श्राप दिई
इन्द्रविनायक ।
खेतमा धानको रास माटोमा भो
परिणत,
नाम त्यस्को रह्यो वाद्वँ
किंवा धान्यगिरि अतः ।।
इमाखेलको पुरानो रूख
सुखशान्ति दिंदै नित्य बनेर
देशरक्षक,
रहून् सुदृष्टि राखेर यहीं
इन्द्रविनायक ।
यसरी प्रार्थनासाथ गर्दै देश-परिक्रमा
मनाइन्छ रथजात्रा गरी कार्तिक
पूर्णिमा ।।
३१ डिसम्बर २००६ (आइतवार)
श्रेष्ठ कृष्णप्रकाश, नेपाली किम्बदन्तीमाला,
वि.सं. २०६३, पृ. ७६-७७ ।
वि.सं. २०६३, पृ. ७६-७७ ।
No comments:
Post a Comment